ചീപ്പ്

കൂരിരുട്ടില്‍ മധു തേടിയിറങ്ങുന്ന ശലഭങ്ങളില്‍
നിന്ന് അഭയദാതാവിന്റെ ചോരയൂറ്റിക്കുടിക്കുന്ന
പേനുകളായ് വിദ്യാര്‍ത്ഥികള്‍ മാറുന്ന ലോകത്ത്
എരിഞ്ഞും വെളിച്ചം വിതറുന്ന ദീപത്തില്‍ നിന്നും
അറ്റന്‍ഡന്‍സും ഇന്റേണലും പല്ലുകളായ് ഭവിക്കും
'ചീപ്പായി' അധ്യാപകര്‍ മാറുന്നതിലെന്തത്ഭുതം.

ബലിദാനി

നൈമിഷികമാമായുസ്സിലഗ്നിധാരിയാമൊരു
തീക്കമ്പിനാകുമേ ബൃഹത്താം സാമ്രാജ്യ
സൗധങ്ങളെ ചാരമായ് മാറ്റിടാന്‍ വ്യര്‍ത്ഥമാകില്ല-
തിന്‍ ബലിദാനമൊരിക്കലും ചിത്തത്തിലര്‍ത്ഥ-
ശങ്കയില്ലാതെയാണൊരാ ധര്‍മസ്ഥാപന കൃത്യ
പൂരണമെങ്കില്‍ സര്‍വദാ.

റബ്ബര്‍

മറ്റാരൊക്കെയോ കുത്തിവരച്ച
തെറ്റുകള്‍ തുടച്ചുമായ്ക്കുവാന്‍
സ്വന്തം ജീവിതം തനിയേ തേച്ചു
പൊടിച്ചു കളയുന്നവന്‍ റബ്ബര്‍
കറുത്തു പോകുവാറുണ്ട്
പലപ്പോഴും എടുത്തുരച്ചാല്‍
വെളുത്തുതുടുത്തു നില്‍ക്കുന്നവ.

ചപ്പില

നാം ചപ്പിലകൾ
രാവിലെ കൊഴിഞ്ഞു വീണ്
വൈകീട്ടടിച്ചു കൂട്ടപ്പെടുന്നവർ
കത്തിയെരിയേണ്ടവർ...

റീകോയിൽ ഓഫ് ഗൺ

ഓരോ തവണ കാഞ്ചിവലിക്കുമ്പോഴും
പുകയുന്ന മനസോടെ

തോക്ക് നമ്മെ ഓർമപ്പെടുത്താൻ
ശ്രമിക്കുന്നു നീ ലക്ഷ്യത്തിൽ നിന്നും അകലുന്നുവെന്ന്